...oder, ä Härzensaglegeheit
Im Januar 13, also vor rund 11 Jahr, hani mit mire Usbiudig zur Spiugruppeleiterin
gstartet. I weis es no genau, es isch e chaute Abe gsi u ig bi ganz
alleini a dä Informationsabe, ids Chirchgmeindhus Johannes z'Bärn,
bevors de richtig losgange isch. Herr Üülenäscht het mi nähr am Abe am
10i wieder abghout, wüu i chli e Schisshaas bi, um die Zyt allei
ungerwägs z'sii. I ha denn nid gwüsst, dass dä Entscheid, absolut dr
Richtig isch, dr erscht Schritt zumene
wunderbare Abentüür u Bruef(ig) isch gsiii. Samschti für Samschti hani
mis Wüsse übers Spiugruppe leite erworbe u ha hüt es guets Fachwüsse,
woni aber loufend ufbessere u witerbiude, so dass i immer ufem nöischte
Stang bi u weis, was im Früehberiich grad louft.
Dr Name üÜlenäscht isch komischerwiiis, scho länger i mim Chopf
umegschwirrt. I ha aber nid gwüsst für was u wieso. Aber i däm Januar,
isch aues klar gsi! Mini Spiugruppe söu so heisse! Sie mues ganz öppis
bsungrigs wärde, irgendwie angers, öppis wos ir Region Langnou no nid
git. I ha ganz viu Ideeä i mim Chopf gha (u es chöme immer wieder
Nöi-i), ha dr Plan gha, dass mir ganz viu verusse si, ha aber no nid
gwüsst wo dass das wird sii.(Schlussändlech hei das di erschte Ching
entschiede.) E Spiugruppe womer aber o chöi dinne sii. Üse
Spiugrupperuum, hani i dere Zyt useme ehemalige Schueuzimmer, nadisnah,
Chindergrächt, farbig u iladend fürs freie Spiiu, igruumt. Weme ine
chunnt söus nid nume d'Chinderouge zum strahle bringe. Er isch e
wunderbari Ergänzig zum eifache Spiu im Wald a üsem Waldplatz, oder am
Bach, worde. Genau so hani mir das vorgsteut.
ds'Wichtigschte aber für mi isch scho denn gsi, dass mit viu
Härz(bluet) u Liebi gschaffet wird. Im Sinne äntwäder AUES U RICHTIG
(mit aune Us- u Witerbiudige, mit auem drum u dran) oder de machi gar
nüt. Ching si ds'wärtvouschte vo üsere Zuekunft. Zu ihne mues me Sorg
ha. Se achtsam u uf Ougehöchi, liebevoll begleite.
Wenn ig a di Usbiudig zrügg dänke, isch es nid immer eifach gsi.
Vorauem denn, weme het söue Bispiu usem Spiugruppe Alltag iibringe. Wüu i
ha de nähr ersch im Auguscht richtig gstartet. Ab denn, hani ändlech
chönne praktiziere u "üebe", was i scho aues glehrt ha. Aui di
Witerbiudigstage hei mi zumene grosse Teil, zu däm gmacht, woni hüt bi. I
weis was i mache, weis wär i bi u weis woni stah.
Dr Muet ha, vor ne horde Lüt härezstah, öppis vortrage oder e Red
haute, isch für mi scho ir Schueu ganz schlimm gsi u immer no nid ganz
miiis. Aber nähr de no dä schliesslech gröscht u letscht Schritt mache,
mini Spiugruppe öffentlech mache, (es het ja scho meh aus eini im Dorf
gha), inseriere u nähr luege was passiert. Das het am meischte Muet
brucht!!!!
Mir hei es wunderbars Hus, amene magische Ort, hei d Struktur u süsch o
aues wos brucht u drum isches für mi immer e Wunsch gsi, öppis mit
Ching zmache. Aber mit so Chliiine???!!? Gwüss nid. Ja, ds'Läbe bringt
eim mängisch anes angers Ort aus das wome planet het, vorauem weme ufs
Härz lost. Immer chliner si Ching worde, bis schliesslech es Mami het
aglüte u mi gfragt het, ob nid ihres drü jährige Frölein dörft
wüchentlech zu mir cho, sie heigi scho vo mir ghört u i machi so kuuli
Sache mit Ching (i ha vor dr SG Zyt so Baschtunamittäg abotte). Ihri
Spiugruppe im Dorf tüi leider zue.
Wieder hani grüblet u überleit. Vorgängig het mi scho mehrmaus, e
Waudspiugruppeleiterin, woni mau amene Märit ha lehre kenne, gmüpft u
ermuetiget, i söu doch e Spiugruppe eröffne. Sie het mir immer wieder
gseit, äs bruchi Mönsche wi mi, mit eme grosse Härz für Ching i däm
Bruef. U d'Natur isch sowieso scho immer wichtig gsi für mi.
Schliesslech hami im November 12 entschiede, ha googlet, telefoniert
(wüu i ganz viu Frage ha gha) u mi schlussändlech agmäudet für di
Spiugruppeusbiudig mit Zertifikat. Mim Maa hani denn, öppe zwe Tag
später verzeut, dass ig de e Usbiudig afa. Das es es Jahr geit. Ha ihm
verzeut vo mim Plan. Er isch denn chli skeptisch gsi: "Weisch, sie
müesse de no da hingere fahre. U de chunnt de no dr Winter. " I ha mi
nid la ufhaute, has gmacht, bi vo mim Maa ungerstützt worde u bi hüt
ungloublech froh u dankbar, das i sone wärtvoue Bruef darf usüebe.
I ha viu schöns chönne erläbe i de letschte 10 Jahr. Ha dr Basis Waud
aghänkt u im November 17 ds Diplom gmacht. Itze fröieni mi uf ne witeri
schöni Zuekunft. E nächschti wunderbari Usbiudig mit Zertifikat steit
vor mir. Aber über das, schribeni de es angers mau.
Woni im Ouguscht 13 Naturspiugruppe üÜlenäscht gründet ha, hani zwöi
Grüppli gha. Ir einte vier Ching, ir angere föifi. Äs si nähr loufend
drzue cho. Hüt hani siebe Gruppe (nächschts Jahr villicht no eini meh,
wüus bi de Grosse scho um di letschte, würklech letschte freie Plätz
geit. Für Zwärgli hani no chli meh...) I ha Ching usem ganze Wuchezytig
Gebiet u ha scho ganz viu Ching dörfe es Stückli vo ihrem Läbeswähäg
begleite. Vo Heimeschwang, vo Äschlismatt, Konufinge und, und, und. Bis
itze si durchschnittlech me Buebe ids üÜlenäscht cho. So Stimme: "er
isch chline wiude" oder: "dr Waud tuet ihm guet." Hani öppe no ghört.
Nächscht Jahr sis z'erschte mau fasch e viertu meh Räubertöchter. Dasch o
schön.
I dene letschte 11 Jahr, hani o ganz viu wunderbari Froue,
Spiugruppeleiterinne Kolleginne, lehre kenne (aber o settegi woni mi ha
gfragt: was machet dir da?) Di Einti u Angeri isch grad bi mir blibe
hange, oder ig a ihne? Isch ja gliich wie. Danke a dere Steu für öii
Fründschafte wo bis da häre hei gha! 
Aber am Aueriwichtigschte für mi: es RIESE GROSSES DANKE a öich Eutere,
für öies Vertroue, wo d'Ching, Wuche für Wuche, zu mir bringe. Danke a
mini Familie u es Danke a aui wo a mi gloubt hei u mi i irgendwelcher
Wiis ungerstützt hei. Ohni öich hätt mini Härzensaglägeheit, mis
üÜlenäscht, nid überläbt. Danke viu, viu mau!!!!!
Keine Kommentare:
Kommentar veröffentlichen