☆ Spiugruppe si wärtvoll...

Spiugruppe si sehr wärtvou. Doch ir Realität, immer wieder es Thema! 

Spiugruppe isch leider nid gleich Spiugruppe

 

Es git Spiugruppe wo zwar Spiugruppe druffe steit, aber nid Spiugruppe drinn isch.

 

 Ganz Wichtig: Spiugruppe isch choschtepflichtig, drum dörft o dir entscheide, wo dir öies Ching id Spiugruppe gäht. Ob itz das im Dorf isch, im Nachbersdorf oder no chli witer wäg, isch öie persönlech Entscheid. Ussage wie, ds'Ching söu dert id Spiugruppe, wo de di angere Ching vom Dorf göh, dass sie sich afe lehre kenne, für de nähr im Chindergarte, isch i de Erwachsene Chöpf, es Erwachseneproblem. Das hei Ching nid. Sie göh mit däm Thema sehr locker u offe um. U wenn es Ching ir Spiugruppe isch gsi, hets normalerwis o kes Problem uf nöiii Ching zuezgah. Es git Fründschafte wo sie ir Spiugruppe gschlosse hei, wo wit übere Chindergarte us göh. Auso, löht nech nid vo angerne Eutere la verunsichere.

 

Spiugruppe si wärtvoll, ds Ching u ds freie Spiel steit im Mittupunkt. Ersts Loslöse, sozials Verhaute fördere, Zämeghörigkeit, uf Fähigkeite vertroue, be-griffe dür Erfahrig, Stärchine entdecke, mit angerne Ching lehre, sich mitteile, uf Erwachseni vertroue, nach em Orientierungsrahmen für frühkindliche Bildung, Betreuung und Erziehung in der Schweiz.

 

Spiugruppe mache Bildig (nid Hüetedienscht, Kinderanimation oder Baschtuwettbewärbe, Kampfbaschtle, im Sinn, wär macht di schönschte Basteleie mit de Ching um d'Eutere chönne z'beidrucke.) Ir SG söu z'Ching si Platz ha u nid SGL für ihri Tate glänze, SG si i der Früehförderig tätig u mache Vorschuel indem sie Ching ganz spielerisch und ohni Druck ufe Chindergarte vorbereite...

 

We Spiugruppe i öier Familie es Thema wird, nähmet öich Zyt, tuuschet euch mit angerne Mamis us, göht ga ineluege. Das darf me nämlich ganz unverbindlech. Weder ire SG göht ga ineluege, de isches nid so, dass es i angerne SG genau so geit. Es git Spiugruppe i ganz verschiedene Arte (Spiugruppe isch aus Name leider nid gschützt u drum chame es Agebot leider schnäu so benenne) ufe Punkt brunge: Ponyspiugruppe, Rösslispiugruppe, wo i some Fau nid ds'Ching im Mittupunkt steit, sondern ds'Pony oder ds'Rössli. Es git Tanzspiugruppe und, es git sogar Alpakaspielgruppe. Spiugruppe heisst nid eifach Spiugruppe! Spiugruppe = Spiel, chunnt vo spiele. U genau das steit ir Spiugruppe im Vordergrund, ds freie Spiu u nid es Rössli putze, es Pony rite, es Tütü trage oder e huffe Baschtusache, wo aui gliich usgseh, mit hei näh.

 

Es git Spiugruppeleiterinne mit ganz verschiedene Haltige oder Usbildige. Es git sogar Spiugruppene, wo d'Leiterinne gar ke Spiugruppeleiterinne Usbildig hei. Fabe u SGL isch nid ds'gliche. Leider wärde mir immer wieder mit dr Kita vergliche. Das isch nid Richtig! Zwöi ganz verschiedeni Institutione, wo ganz ungerschiedlechi Ufgabe hei. Kita ghört zur Betröig, mir zur Bildig. Me darf nachefrage, was SGL für Usbildige hei.

 

Lueget wos für eues Ching passt, o für euch Eutere, Vertroue isch wichtig, schliesslich isch d'Spiugruppeleiterin meistens, di ersti Frömdperson für ds'Ching. Sich ustuuusche, Kreativ siii, Kreativität ohni Vorgab, ohni Muschter. ds'Ching darf di ungerschiedlechste Materiau entdecke und be-griffe, säuber grosses er-schaffe. Nume so wird d'Fantasie förderet! Erfahrige sammle, Sinne erlebe, Nöis usprobiere, Fründschafte schliesse, d'Sprach/Fantasie fördere, Värsli, Gschichte, Liedli u no so viel meh passiert im Spiugruppejahr. Luegets a, nämet öich Zyt.

 

Mir als Leiterin vo mire Spiugruppe, isch es sehr wichtig, dass ig o i Sache Biudig, Entwicklig und Förderig ufem aktuellste Stang bi. Drum bsuecheni regumässig Witerbildige (es steit nid nume uf mire Internetsite u mache tueni de gliich nüt - Papier oder o ds Internet nimmt aus a). Genauso, steit bi mir Qualität im Vordergrund. 

 

In diesem Sinne wünsche ig euch u euem Ching e wunderbari u unvergässlechi Spiugruppezyt